”ჯეოსელის” ქსელი მწყობრში ჩადგა

დღეს დილიდან მობილური კავშირგაბმულობის კომპანია ”ჯეოსელის” ქსელი გამართულად მუშაობს. კომპანიას პრობლემები გუშინ საღამოს, დაახლოებით სამი საათის განმავლობაში შეექმნა. შეფერხების გამო ”ჯეოსელის” ასიათასობით აბონენტი მობილური კავშირგაბმულობის გარეშე დარჩა. კომპანია ქსელის პარალიზების მიზეზად ტექნიკურ რეორგანიზაციის დროს წარმოქმნილ პრობლემებს ასახელებს.

[ ... ]

ყირგიზეთის სცენარის გამეორება შესაძლებელია!

რუსეთის პრეზიდენტი დიმიტრი მედვედევი ყირგიზეთის სცენარის გამეორებას დსთ-ს სხვა ქვეყნებშიც არ გამორიცხავს. ამის შესახებ "რია ნოვოსტი" იუწყება.

"არსებობს საშიშროება, რომ პოსტსაბჭოთა ქვეყნებში ყირგიზეთის მსგავსი სცენარი განვითარდეს. თუ ხალხი ხელისუფლებით უკმაყოფილოა, ხელისუფლება კი მათ პრობლემების მოგვარებისთვის აუცილებელ ზომებს არ მიმართავს, მითუმეტეს როცა ხელისუფლება საზოგადოებასთან კონტაქტს კარგავს, ასეთ შემთხვევაში ყირგიზეთის სცენარი შეიძლება ნებისმიერ ქვეყანაში განმეორდეს", - განუცხადა მედვედევმა ჟურნალისტებს.

[ ... ]

კაჩინსკისა და მისი მეუღლის დაკრძალვის თარიღი შესაძლოა, შეიცვალოს

პოლონეთის პრეზიდენტისა და მისი მეუღლის დაკრძალვის თარიღი შესაძლოა, შეიცვალოს.

როგორც პოლონეთის პრეზიდენტის კანცელარიის წარმომადგენელმა, იაცეკ საშინმა ადგილობრივ რადიოსადგურს განუცხადა, თარიღის შეცვლის მიზეზად აეროპორტების შეფერხებული მუშაობა სახელდება.

მისი თქმით, ისლანდიაში ამოფრქვეული ვულკანის ფერფლმა სერიოზული პრობლემები შეუქმნა ევროპულ ავიაკომპანიებს. სავარაუდოდ, ევროპის ცაზე გაფანტული ვულკანის ფერფლი ხელს შეუშლის სხვადასხვა ქვეყნების პირველი პირების პოლონეთში ჩასვლას.

"გუშინ სპეციალურმა ჯგუფმა, რომელიც დაკრძალვისა და სამგლოვიარო ღონისძიებებს ხელმძვანელობს, ვერ შეძლო შეთანხმება, გადაიდოს თუ არა დაკრძალვის ცერემონია. ჩვენ საგანგებო რეჟიმში ვმუშაობთ და გადაწყვეტილებას, შეიცვლება თუ არა დაკრძალვლის თარიღი, უახლოეს ხანში გამოვაცხადებთ." აღნიშნა იაცეკ საშინმა.

პოლონეთისა და მისი მეუღლის დაკრძლვა 18 აპრილისთვის იყო დაგეგმილი.
[interpresnews.ge]

[ ... ]

სეპარატისტული მთავრობის ლიდერი თურქეთში ჩასვლას აპირებს

მედიაში ახლახან გამოქვეყნებული ცნობების თანახმად, აფხაზეთის სეპარატისტული მთავრობის ლიდერი უახლოეს მომავალში თურქეთში ჩასვლას აპირებს. ამ და სხვა საკითხებთან დაკავშირებით ამერიკის ხმის ქართულმა რედაქციამ ინტერვიუ ჩამოართვა თურქ ექსპერტს შაბან ქარდაშს. ბატონი ქარდაში უტას შტატის უნივერსიტეტში ასწავლის და ვებ გვერდ „ინსაით თურქი"-ს რედაქტორის მოადგილეა. მას ბევრი ანალიტიკური სტატია აქვს გამოქვეყნებული სხვადასხვა გამოცემებში, მათ შორის ჯეიმსთაუნის ფონდის ცნობილ ყოველდღიურ ანალიტიკურ დაიჯესტში, „ეურეიჟა დეილი მონიტორ"-ში.

აფხაზეთის სეპარატისტული ხელისუფლების ლიდერის სერგეი ბაღაპშის თურქეთში სამომავლო ვიზიტთან დაკავშირებით, ბატონმა ქარდაშმა აღნიშნა, რომ, ბაღაპშის ვიზიტს მოუთმენლად ელის თურქეთში მცხოვრები მრავალრიცხოვანი აფხაზური დიასპორა. მისი თქმით:

„ეს დიასპორა საკმაოდ აქტიურია და ისინი ცდილობენ გავლენა მოახდინონ თურქეთის მთავრობაზე რათა რაღაცა გაკეთდეს საქართველოსა და აფხაზეთში შექმნილ მდგომარეობასთან დაკავშირებით. ამ დიასპორას აფხაზეთთან მჭიდრო კავშირი აქვს ძირითადად ეკონომიკური ურთიერთობების სფეროში. ისინი ხომ აფხაზეთს წლების მანძილზე ჰუმანიტარულ და ფინანსურ დახმარებას აწვდიდნენ. ამდენად, მე ვფიქრობ, რომ ბაღაპშის ვიზიტი სწორედ დიასპორასთან ურთიერთობების გაღრმავებას შეუწყობს ხელს. აქვე დავძენ, რომ ეს არაოფიციალური ვიზიტი იქნება, რომელიც ჩვენ დიასპორასთან ურთიერთობების განვითარების კონტექსტში უნდა განვიხილოთ. თურქულ პრესაში გამოქვეყნებული ცნობების თანახმად, ბაღაპში დიასპორის სახელზე მიმართვის გაკეთებას აპირებს, რომელშიც იგი მადლიერებას გამოხატავს აფხაზეთისთვის გაწეული დახმარებისთვის."

ქარდაშის თქმით, თურქეთში აფხაზური დიასპორის დამოკიდებულება აფხაზეთის მიმართ ემოციურ დონეზე ნოსტალგიური გრძნობებით შემოიფარგლება, რაც იმას არ ნიშნავს, რომ იქ დაბრუნების მსურველი ბევრია. ხოლო აფხაზეთის სეპარატისტულ მთავრობას სურს თურქეთსა და ახლო აღმოსავლეთის რეგიონში მცხვორები აფხაზური დიასპორის წარმომადგენლების ისტორიულ სამშობლობლოში დაბრუნება რადგან ეს აფხაზეთში თვით აფხაზების დემოგრაფიულ შემცირებას შეაჩერებს. ამასთან დაკავშირებით ქარდაში აგრეთვე აღნიშნავს:

„თუ ის რაც მე ერთ-ერთ თურქულ ვებ გვერდზე წავიკითხე სიმართლეს შეესაბამება, აფხაზეთის ლიდერს უთქვამს, რომ განხილვის პროცესშია გადაწყვეტილება რომლის თანახმადაც საზღვარგარეთ აფხაზური დიასპორის წევრებს აფხაზეთის არჩევნებში ხმის მიცემის უფლება მიეცემათ. ამდენად მე არ გამოვრიცხავ, რომ გრძელვადიან პერსპექტივაში მათ აფხაზეთის მოქალაქეობაც მიენიჭოთ."

16 დეკემბერს ანკარაში მდებარე ანალიტიკურმა ცენტრმა, თურქეთის ეკონომიკური პოლიტიკის კვლევის ფონდმა გამოაქვეყნა ანალიტიკური გამოცემა სათაურით „აფხაზეთი შავი ზღვის ინტეგრაციას მხარს უჭერს." ქარდაში ასე გამოეხმაურა ხსენებულ გამოცემას:


„ამ გამოცემასთან დაკავშირებით რამოდენიმე შენიშვნის გაკეთება მსურს. უპირველეს ყოვლისა მე უნდა ავღნიშნო, რომ მოხსენების ავტორის მიდგომა მხოლოდ ეკონომიკურ ფაქტორებს ემყარება, და იგი სამწუხაროდ უგულვებელყოფს პოლიტიკურ, სტრატეგიულ და სამხედრო ფაქტორებს. ეს კი ნაკლებად დამაჯერებლს ხდის მის ანალიზს რადგან ეკონომიკური განვითარება არსებული პოლიტიკური პრობლემების მოგვარების გარეშე არარეალისტურია. მაგრამ ეს მოხსენება ჩვენ უნდა განვიხილოთ იმ კონტექსტში, რომ თურქეთის აფხაზურ დიასპორაში შეინიშნება მზარდი შეშფოთება იმასთან დაკავშირებით, რომ თუ თურქეთი აფხაზეთთან ეკონომიკური ურთიერთობების დამყარებას ვერ შესძლებს, მაშინ ამას აფხაზეთის რუსეთთან იძულებითი ინტეგრაცია მოჰყვება. აქვე უნდა გავიხსენოთ ისიც, რომ მიმდინარე წლის დასაწყისში ბაღაპშის თურქეთში ვიზიტი იგეგმებოდა, მაგრამ ჩაიშალა, და იგი თურქეთის მაგივრად სოჭში პუტინთან შესახვედრად ჩავიდა. ამის შემდეგ შეინიშნება მზარდი შეშფოთება, რომ აფხაზებს აიძულებენ რუსეთთან ინტეგრაციისკენ. თურქეთის აფხაზური დიასპორის გადმოსახედიდან საქართველოდან რაიმე საფრთხის შესაძლებლობა აღარ არსებობს, მაგრამ ამჟამად აფხაზეთისთვის ყველაზე მნიშვნელოვან პრობლემას რუსეთთან თანაბარი და მისაღები ურთიერთობების დამყარება წარმოადგენს. აქვე ისიც უნდა დავამატო, რომ ორგანიზაციას, რომელმაც ხსენებული მოხსენება გამოაქვეყნა - თურქეთის ეკონომიკური პოლიტიკის კვლევის ფონდს - აფინანსებს თურქეთის სავაჭრო საბჭოების კავშირი, რაც, ბუნებრივია იმის მანიშნებელია, რომ წინა პლანზე ეკონომიკური ინტერესებია წამოყენებული."

ბატონმა ქარდაშმა ასე დაახასიათა დღემდე მიღწეული პროგრესი თურქეთ-სომხეთის ურთიერთობების ნორმალიზაციის სფეროში:


„თურქეთის სომხეთთან ურთიერთობების ნორმალიზაციასთან დაკავშირებული სვლები ეფუძნებოდა ნაგულისხმევ ვარაუდს, რომ ამას წინ უნდა უძღვოდეს აზერბაიჯანსა და სომხეთს შორის არსებული პრობლემების მოგვარება. რადგან ეს ვარაუდი არ გამართლდა და აზერბაიჯანმა და სომხეთმა ვერ შესძლეს რეალური პროგრესის მიღწევა ამ მიმართულებით, ახლა, როგორც ჩანს, თურქეთ-სომხეთის ურთიერთობების ნორმალიზაცია შეფერხდა. ვინაიდან პროგრესი ამ მიმართულებით თავიდანვე დამოკიდებული იყო მთიანი ყარაბაღის საკითხის გადაჭრაზე, ჩიხში მოქცევაც საკმაოდ მოსალოდნელი იყო."

[ალექსანდრე მელიქიშვილი]

[ ... ]

ოპოზიცია ქუთაისში საპროტესტო აქციებს გეგმავს

ქუთაისში მოქმედი ყველა ოპოზიციური პარტიის ლიდერები და აქტივისტები დღეს დილით ქალაქის მერიის წინ შეიკრიბნენ და გუშინ მომხდარი უბედური შემთხვევა გააპროტესტეს.
ოპოზიციონერებმა გუშინ ქუთაისში განვითარებულ მოვლენებს ვანდალური საქციელი უწოდეს და სასტიკად დაგმეს. მათ საქართველოს პრეზიდენტს მოუწოდეს, გუბერნატორის გარდა თანამდებობიდან გაათავისუფლოს იმ ძალოვანი სტრუქტურების წარმომადგენლები, რომლებიც აღნიშნულ აფეთქებას პირადად ხელმძღვანელობდნენ.
ოპოზიციის წარმომადგენლები აცხადებენ, რომ როდესაც რაიმე ცვლილება ხდება, ყოველთვის გუბერნატორს ან მერს ცვლიან, რაც შედეგს არ იძლევა, ხოლო ძალოვანი სტრუქტურები პასუხს არაფერზე აგებენ. მათ მოსახლეობას მოუწოდეს ფართომასშტაბიანი საპროტესტო აქციების გამართვისკენ იმ ადგილას, სადაც მემორიალი ააფეთქეს.
პირველი ასეთი აქცია ხვალ, 13.00 საათზე გაიმართება. ოპოზიცია ხვალისთვის ქუთაისში ხუთი ოპოზიციური პარტიის ლიდერს ელოდება, თუმცა, ამ ეტაპზე არ არის ცნობილი, რომელი ლიდერები ჩავლენ ქუთაისში. საპროტესტო აქციაში ასევე მონაწილეობას მიიღებენ სამამულო ომის ვეტერანები.
ქუთაისში "დიდების მემორიალის" აფეთქების შედეგად გუშინ ორი ადამიანი - 8 წლის ნინო ჯინჭარაძე და მისი დედა დაიღუპა. მემორიალი, დემონტაჟის მიზნით, ქუთაისის მუნიციპალიტეტის დაკვეთით, სს "საქფეთქმრეწვმა" ააფეთქა. მომხდართან დაკავშირებით აღძრულია სისხლის სამართლის საქმე. საქართველოს მთავარი პროკურატურის ინფორმაციით, უბედური შემთხვევა უსაფრთხოების წესების დარღვევამ გამოიწვია.
უბედური შემთხვევის გამო გუშინ პრეზიდენტმა მიხეილ სააკაშვილმა დანიაში ვიზიტი შეწყვიტა და თბილისში დაბრუნდა. მან მომხდარი ტრაგედიის გამო მწუხარება გამოთქვა, ხოლო იმერეთის გუბერნატორი ირაკლი ჩოგოვაძე თანამდებობიდან გაათავისუფლა.
[ ... ]

მთავარია საზოგადოებას ახალი საპროტესტო ტალღის შესახებ დავაჯეროთ

მთავარია, საზოგადოებას დავაჯეროთ ახალი საპროტესტო ტალღის შესახებ, რომელიც ყველაფერს გულისხმობს, რაც საპროტესტო ტალღას სჭირდება, - ამის შესახებ, ოპოზიციისა და სამოქალაქო საზოგადოების შეხვედრის დასრულების შემდეგ ჟურნალისტებს ოპოზიციის ერთ-ერთმა ლიდერმა ლევან გაჩეჩილაძემ განუცხადა.
მისი თქმით, ყველაფერს თავისი დრო აქვს - არჩევნებში მონაწილეობასაც და უარის თქმას, ერთიანი კანდიდატის გამოცხადებას და ამა თუ იმ ფორმით გაერთიანებასაც.
ოპოზიციისა და სამოქალაქო საზოგადოების შეხვედრა დღეს სასტუმრო "პრიმა ვერეში" გაიმართა, სადაც მსჯელობის მთავარი საკითხი გაზაფხულზე დაგეგმილი ადგილობრივი არჩევნები იყო.

[ ... ]

სოხუმის რეჟიმს კოდორის ხეობაში საარჩევნო უბანი არ გაუხსნია

სოხუმის რეჟიმს ე.წ. საპრეზიდენტო არჩევნებისთვის კოდორის ხეობაში საარჩევნო უბანი არ გაუხსნია. ამის შესახებ “ინტერპრესნიუსს” კოდორის ხეობიდან დევნილმა, სპარტაკ გურჩიანმა აცნობა.
”კოდორის ხეობაში ქართული მოსახლეობა თითქმის აღარ დარჩა. იქ, ძირითადად, აფხაზები და რუსი სამხედროები მოძრაობენ. ამდენად, ჩვენი ინფორმაციით, ხეობაში საარჩევნო უბანი არ გაუხსნიათ. კოდორის ხეობასთან სატელეფონო კონტაქტი თითქმის შეუძლებელია, მაგრამ ეს ინფორმაცია იმ კოდორელებისგან გვაქვს, ვინც ხეობიადნ ჩამოდიან”, - აღნიშნა სპარტაკ გურჩიანმა.
სოხუმის რეჟიმი დღეს ე.წ. საპრეზიდენტო არჩევნებს ატარებს. კენჭს იყრის 5 კანდიდატი - მოქმედი დე ფაქტო პრეზიდენტი სერგეი ბაღაფში, ყოფილი დე ფაქტო ვიცე-პრეზიდენტი რაულ ხაჯიმბა, ოპოზიციური “ეკონომიკური განვითარების პარტიის” ლიდერი ბესლან ბუთბა, “აფხაზეთის საზღვაო სანაოსნოს” ხელმძღვანელი ზაურ არძინბა და უპარტიო ვიტალი ბღანბა.


[ ... ]

ჰაკერებმა კიდევ ერთი კიბერ შეტევა განახორციელეს

ინტერნეტ პორტალ პრესა.გე -ზე განხორციელდა კიბერ შეტევა, რის გამოც საიტი მთელი 6 საათის განმავლობაში მიუწვდომელი იყო ვიზიტორებისტვის. პრესა.გე-ს ადმინისტრაცია მომხდარში შინაგან საქმეთა სამინისტროს ადანაშაულებს.
"ვთხოვთ რეაგირებას კოლეგებს და უფლებადამცავ ორგანიზაციებს. კიბერშეტევა ამ წუთებშიც მიმდინარეობს" – ვკითხულობთ პორტალის ადმინისტრაციის მიერ გავრცელებულ სპეციალურ წერილში.




[ ... ]

ინტერნეტ თავდასხმა ქართულ სააგენტოზე...

საინფორმაციო სააგენტო „GeoTopNews”-ის ინტერნეტ გვერდი ჰაკერებმა გატეხეს. როგორც „ღია ბოქლომს“ სააგენტოს რედაქტორმა რომან კევნიშვილმა აცნობა პორტალზე ახალი ამბების განთავსება ვერ ხერხდება. მისი თქმით საფუძვლიანია ეჭვი, რომ ვებ–გვერდი მწვავე სტატიების გამო კიბერ შეტევის ობიექტი გახდა.
"ვვარაუდობთ, რომ შეფერხება როგორც ბოლო დროს ჩვენს მიერ გავრცელებულ მასალებს, ასევე 7 ნოემბრის თარიღის მოახლოებას უკავშირდება. ჩვენი სისტემური ადმინისტრატორი, ამ დრომდე უშედეგოთ ცდილობს საიტის „ადმინპანელის“ ჩართვას, გვერდის განახლების მიზნით." –ამბობენ „ჯეოტოპნიუსის“ ჯგუფის წევრები.




[ ... ]

თეა თუთბერიძე მედიით გავრცელებულ ინფორმაციას უარყოფს

თავისუფლების ინსტიტუტის წევრი, თეა თუთბერიძე,მედიით გავრცელებულ ინფორმაცია, მისი დაკავების შესახებ უარყოფს. როგორც თუთბერიძემ, "ღია ბოქლომთან" სატელეფონო საუბარში განაცხადა, გავრცელებული ხმები მისი დაკავების შესახებ, სიმართლეს არ შეესაბამება.

– "არ ვიცი ვის დაჭირდა ამ ინფორმაციის გავრცელება. არ გამოვრიცხავ, წინასწარ ავრცელებენ ხმებს, მაგრამ ჯერჯერობით თავისუფალი ვარ და მსგავსი არაფერი მომხდარა“, – აცხადებს თუთბერიძე.

შეგახსენებთ, რომ ინფორმაცია, თეა თუთბერიძის დაკავების შესახებ, მედიით დღეს დაახლოებით 16 საათზე გავრცელდა.
[ ... ]

42 მილიარდი სტრესთან ბრძოლისთვის

ბრიტანეთის ჯანდაცვის სისტემის ექსპერტები დამსაქმებლებს ურჩევენ, სრულიად პრაგმატული მიზეზებიდან გამომდინარე, უფრო ყურადღებით მოეკიდონ თავიანთ თანამშრომელთა სტრესის დონეს.

მედიკოსთა თქმით, დიდ ბრიტანეთში ყოველწლიურად სულიერად დაავადებულთა მკურნალობაზე 28 მლრდ ფუნტი სტერლინგი (დაახლოებით 42 მლრდ დოლარი) იხარჯება.

პრაქტიკულად, ამ ხარჯის ერთადერთ მიზეზად ცუდი ხელმძღვანელები დასახელდნენ, რომლებიც სათანადო ყურადღებას არ უთმობენ საკუთარ თანამშრომლებს.


[ ... ]

გამსახურდიას გარდაცვალების მიზეზებს საპარლამენტო კომისია დაადგენს

საქართველოს პირველი პრეზიდენტის, ზვიად გამსახურდიას გარდაცვალების მიზეზებს 11-წევრიანი საპარლამენტო კომისია დაადგენს.
კომისიის შესახებ დეტალები პარლამენტის დღევანდელ პლენარულ სხდომაზე დეპუტატებს საკითხის ინიციატორმა, “ქართული დასის” ლიდერმა ჯონდო ბაღათურიამ გააცნო.
მისი თქმით, აღნიშნული თერტმეტი წევრის ვინაობა ორი კვირის განმავლობაში გაირკვევა.
კომისიის შექმნის შესახებ დადგენილებაში, ასევე, ჩაიწერება, რომ კომისია სამი თვით იქმნება.
პარლამენტი ზვიად გამსახურდიას სიკვდილის მიზეზების დამდგენ საპარლამენტო კომისიის შექმნაზე დადგენილებას დღეს, დღის მეორე ნახევარში მიიღებს.


[ ... ]

ფილიპინების სასამართლოს მორიგი უკანონო ქმედება

ფილიპინებში დაკავებულ 13 ქართველ მეზღვაურს მათ საქმეზე მანილის სასამართლოს გადაწყვეტილებას არ აცნობენ. 
 ამის შესახებ “ინტერპრესნიუსს” მანილას ციხიდან ერთ-ერთმა დაკავებულმა ქართველმა მეზღვაურმა, თამაზ მალაყმაძემ აცნობა. 
მისივე თქმით, სასამართლო პროცესამდე, რომელიც 8 ოქტომბერს გაიმართა, ადვოკატი ირწმუნებოდა, რომ ციხეს 10 ოქტომბრისთვის დატოვებდნენ და სამშობლოში კვირას გამოემგზავრებოდნენ, მაგრამ სასამართლოს დასრულების შემდეგ ქართველ მეზღვაურებთან ადვოკატი საერთოდ არ გამოჩენილა.
მალაყმაძის ინფორმაციით, ქართველ მეზღვაურთა გათავისუფლებისთვის მანილის სასამართლო ფილიპინურ კომპანია “ლაპლატას”, სადაც ქართველი მეზღვაურები მუშაობდნენ, ჯარიმის გარდა, ქრთამის სახით საკმაოდ დიდ თანხას სთხოვს, რის გამოც მათი გათავისუფლება ყოვნდება. 
ქართველი მეზღვაურები კიდევ ერთხელ თხოვენ საქართველოს ხელისუფლებას, ყველაფერი გააკეთონ უკანონოდ დაკავებული მეზღვაურთა სამშობლოში დასაბრუნელად.

ფილიპინებზე პანამის დროშის ქვეშ მცურავი გემი, რომლის ეკიპაჟის 13 წევრიც საქართველოს მოქალაქეა, 17 აგვისტოს დააკავეს. არსებული ინფორმაციით, გემს კონტრაბანდული იარაღი გადაჰქონდა.





[ ... ]

ალექსანდრე ბასილაია დიდუბის პანთეონში დაკრძალეს

ალექსანდრე ბასილაია დიდუბის საზოგადო მოღვაწეთა პანთეონში დაკრძალეს.  
მანამდე კი, დიდუბის ტაძრის მოძღვარმა ბასილაიას სულის მოსახსენებელი პანაშვიდი გადაიხადა. 
ალექსანდრე ბასილაია უკანასკნელ გზაზე ოჯახის წევრებმა, მეგობრებმა და მისი შემოქმედების თაყვანისმცემლებმა გააცილეს. 
სამოქალაქო პანაშვიდი დღეს დილიდან ფილარმონიის დიდი საკონცერტო დარბაზში მიმდინაორებდა. 
ალექსანდრე ბასილაია ხანგრძლივი ავადმყოფობის შემდეგ, 67 წლის ასაკში გერმანიაში 3 ოქტომბერს გარდაიცვალა. ბასილაია 1942 წლის 11 მარტს დაიბადა. იყო საქართველოს ხელოვნების დამსახურებული მოღვაწე, თბილისის საპატიო მოქალაქე და ანსამბლ „ივერიის“ სამხატვრო ხელმძღვანელი. 

ბასილაია ავტორია ისეთი ცნობილი მიუზიკლებისა, როგორებიც არის - „არგონავტები“, „ჩხიკვთა ქორწილი“, „ფიროსმანი“. მას ეკუთვნის ასევე არაერთი ცნობილი ქართული საესტრადო სიმღერა და ქართული კინოსა და მულტიპლიკაციური ფილმებისთვის შექმნილი მუსიკა. მისი ბოლო ნამუშევარია მუსიკალური კომპოზიცია - „რაღაც დასრულდა“.





[ ... ]

აქციამ ზუგდიდში ”ანგარიში ხალხს” მხოლოდ ოპოზიცია გააღიზიანა [video]

ის, რაც საქართველოს მთავრობისთვის მიღწევად მიიჩნევა და ”ანგარიში ხალხს” ჰქვია, ოპოზიციამ სააკაშვილის ნოსტალგიური ვნებების დაკმაყოფილებად შეაფასა.

ზუგდიდის ”საკნებიდან” რამდენიმე მეტრში, თითქმის ნახევარი კილომეტრის მანძილზე გაშლილმა ”საქართველოს მთავრობის მიღწევებმა” საპროტესტო აქციის მონაწილეებს კომუნისტური რეჟიმი გაახსენა.

აქციის ორგანიზატორმა კახა მიქაიამ კი ”ანგარიში” ”ВДНX”-ს ცნობილ გამოფენას შეადარა.

კახა მიქაია: ”მართლა თუ უნდა სააკაშვილს ანგარიში ჩააბაროს ხალხს და დიალოგი გამართოს მასთან, ილაპარაკოს იმაზე, თუ როგორ დაკარგა ტერიტორიები, როგორ წამოეგო რუსეთის პროვოკაციას, წააგო ომი, გაანადგურა ქართული ჯარი, როგორ მიმდინარეობს საქართველოში დემოკრატიული ინსტიტუტების რღვევა, როგორ ირღვევა ადამიანის უფლებები, რამდენი პოლიტპატიმარი ჰყავს მას ციხეში... როგორ აქცია მან ჩვენი სამშობლო ყვარყვარეს ციხედ და რა მდგომარეობაშია მედია... რაც შეეხება იმ საკენკს, რომელიც ამ პიარ-აქციის სახით დაუყარა სააკაშვილმა და მისმა ხელისუფლებამ ზუგდიდელებს, ვურჩევ თავად აკენკონ”.

ოპოზიციის განწყობაზე რომ არაფერი ვთქვათ, ხელისუფლებას 22 სექტემბერს ზუგდიდში ნამდვილად არ გაუმართლა. გადაუღებელმა წვიმებმა დამთვალიერებელთა რიცხვი შეამცირა, თუმცა ქვეყნის თავდაცვის მინისტრი, რომელიც თავს მასპინძლადაც გრძნობდა, საპირისპიროს ამტკიცებდა.

ბაჩო ახალაია: ”შემიძლია გითხრათ, ყველგან ეგრეა, ძაან დიდი ინტერესია. ჩემი შთაბეჭდილება ზუსტად ისეა, რასაც ველოდი. ინტერესი არის, მიუხედავად წვიმისა, ხალხი მაინც მაინც ათვალიერებს თავდაცვის სამინისტროს მიღწევებს”.

ბაჩო ახალაიამ სიტყვაძუნწობა არჩია, მაგრამ სოფლის მეურნეობის მინისტრის მოადგილემ, ალეკო ცინცაძემ ”ბევრი ილაპარაკა.” მან საუბარში გურული იუმორის ელემენტებიც ჩართო და ”მდგომარეობიდან გამოძვრა”.

ორივე სამინისტრო ქალაქის მთავარ მოედანზე, პირდაპირ თუ ირიბად, ფართოდ იყო წარმოდგენილი. საბრძოლოს, არც სოფლის ტექნიკა ჩამოუვარდებოდა. თუ ახალაიამ ლამის ”გრადები” განალაგა, ცინცაძემ, როგორც თავად აღნიშნა, ”ნოუჰაუ” ტრაქტორები ჩაამწკრივა... ახალაიას შემდეგ ის ერთადერთი მინისტრის მოადგილე იყო, ვინც ”მისი” სამინისტროს პავილიონთან ”ტრიალებდა”.

ალეკო ცინცაძე: ”მე ბევრს ვილაპარაკებ, თან ლაპარაკი და თან საქმის კეთება არ გამოდის თუ რა?! მე მახსოვს, გურიაში ჩაის კრეფა რომ მიდიოდა და საკმაოდ სერიოზული, სიმღერ-სიმღერით იკრიფებოდა და მაშინ რომ მეთქვა, კარგად ვმღერი-მეთქი, მეტყოდნენ საქმის გამკეთებელი არ ხარო... არა, ვლაპარაკობთ კიდეც რაც ხალხს აინტერესებს. ის კი არა, უბრალოდ, რომ ვლაპარაკობთ, ვეუბნებით, რა გავაკეთეთ, რას ვაპირებთ და შესაბამისად ვმსჯელობთ...”

მინისტრის მოადგილეს მართლაც მხოლოდ ახსოვს გურიაში ჩაის პლანტაციების არსებობა და იგი ამ საკითხზე იმ მეგრელ გლეხთან მსჯელობდა, რომელსაც ასევე კარგად ახსოვს ეს კულტურა. ”ასე უცებ ხომ არ გადაწყდება ეს ამბავი. ჯერჯერობით პასუხს მაძლევენ და ეს მაკმაყოფილებს, ცხადია შედეგი თუ მოჰყვა”, - ამბობდა ზუგდიდელი კაცი.

მთავრობის შეთავაზებული ”სანახაობით”, ზუგდიდში ბევრი ადამიანი კმაყოფილი დარჩა. ყოველ შემთხვევაში ის, ვინც იქ მივიდა. მიმსვლელთა ძირითადი ნაწილი კი, ახალგაზრდა ყმაწვილები იყვნენ, რომლებიც წვიმისაგან გაწუწულ-გალუმპულები საბრძოლო ტექნიკასთან, მობილური ტელეფონის ობიექტივში პოზირებდნენ...

სამხედრო ჯავშან-ტექნიკით დაინტერესება ერთმა ზუგდიდელმა ასაკოვანმა მამაკაცმაც გამოხატა, რომელმაც ვერ გაარკვია, თანხები ”ჩვენებას” მოხმარდეს თუ შეარაღებას. ”ჩვენი უპირველესი ამოცანაა ქვეყნის თავდაცვა. რაც უფრო ხშირად მოეწყობა ეს, ხალხი ნახავს, მან უნდა გაიგოს რას აკეთებს ჩვენი მთავრობა მის საკეთილდღეოდ. ჩემი აზრით მეტი უნდა დაიხარჯოს იმიტომ, რომ ჩვენი თავდაცვისუნარიანობა განმტკიცდეს.” - ამბობს მურთაზ რაფავა.

უკვე ”განმტკიცებულ” შს სამინისტროს პავილიონთან, როგორც მოსალოდნელი იყო, დამთვალიერებელთა ყველაზე მცირე რაოდენობა მივიდა. ეს ის ადგილია სადაც შსს წარმომადგენელს ზუგდიდელებთან ერთად ”პრესა. გე”-ც ეძებდა. პავილიონთან მყოფი რამდენიმე ახალგაზრდა, ადმინისტრაციის წარმომადგენელს ”უშედეგოდ” ეძებდა... წერილების ურნაშიც სავარაუდოდ მხოლოდ ერთი ბარათი ჩავარდა-7 წლის წინ მოკლული პოლიციელის, ზაზა ქებურიას დედა დამნაშავის დასჯას ვანო მერაბიშვილისგან ელის...

საინტერესო ”სამთავრობო ჩვენებაში” ისიც იყო, რომ ”პრესა.გე”-მ ე.წ. პავილიონებთან ვერცერთი კრიტიკულად განწყობილი ზუგდიდელი ვერ აღმოაჩინა...

[ნანა ფაჟავა, ზუგდიდი. presa.ge]


[ ... ]

მთავრობის აქცია "ანგარიში ხალხს" დღეს რუსთავში გაიმართება

საქართველოს მთავრობის აქცია "ანგარიში ხალხს" დღეს რუსთავში გაიმართება. 
 ქალაქის შესასვლელიდან შარტავას გამზირის მიმართულებით ავტოტრანსპორტისთვის გზა გადაიკეტება. “რუსთაველებს საშუალება ექნებათ სხვადასხვა სამინისტროების მიერ გაწეულ საქმიანობას დეტალურად გაეცნონ. რუსთავში თითქმის ყველა სამინისტროს წარმომადგენლები და მინისტრები ჩამოვლენ”, - განაცხადა "ღია ბოქლომს" საუბარში რუსთავის ვიცე-მერმა პავლე ლაცაბიძემ. 
 შარტავას გამზირზე თითქმის ყველა სამინისტროს სტენდია განთავსებული


[ ... ]

მოსკოვის მერი იური ლუჟკოვი ცხინვალში ჩავიდა

მოსკოვის მერი იური ლუჟკოვი ე.წ. სამხრეთ ოსეთში ჩავიდა. ამის შესახებ ცხინვალის ინფორმაციის და ბეჭდვითი დე ფატო სიტყვის კომიტეტი იუწყება. 
 ლუჟკოვი ედუარდ კოკოითიმ მიიღო. მან მოსკოვის მერს „სამხრეთ ოსეთის ხალხისადმი მუდმივი ყურადღებისთვის“ მადლობა გადაუხადა. 
 „ჩვენ გვახსოვს, რამდენი გააკეთა მოსკოვის მთავრობამ ჩრდილოეთ ოსეთისთვის ბესლანის ტრაგედიის დღეებში და დღესაც, აგვისტოს დღეების შემდეგ მოსკოვი ჩვენს გვერდით არის. მოსკოვი ერთ-ერთი პირველი იყო, ვინც სამხრეთ ოსეთის ხალხს დაეხმარა“, - აღნიშნა კოკოითიმ. 
 თავის მხრივ, იური ლუჟკოვმა ე.წ. სამხრეთ ოსეთის ხელისუფლებას თანამშრომლობისთვის მადლობა გადაუხადა.  
 „ჩვენ თანამებრძოლები ვართ იმ პროცესებში, რომლებიც საბოლოოდ სამხრეთ ოსეთის სახელმწიფოს შექმნით დასრულდა. როცა რესპუბლიკაში რთული დრო იყო, მოსკოველები შეგნებულად ეხმარებოდნენ სამხრეთ ოსეთს მატერიალური პრობლემების გადაჭრაში და ამას სუფთა გულით აკეთებდნენ იმის შეგნებით, რომ არ შეიძლება, სამხრეთ ოსეთის მოწყვეტა ისტორიული ფუნდამენტისგან“, - განაცხადა ლუჟკოვმა.
 მისივე თქმით, გასული წლის ტრაგიკული მოვლენების დროს ყველა აღშფოთებული იყო მიხეილ სააკაშვილის მიერ განხორციელებული თავდასხმითა და გენოციდით. 
 იური ლუჟკოვი ცხინვალს დღეს ეწვია და ცხინვალის ახალაშენებული უბნის – „მოსკოვის მიკრორაიონის“ საზეიმო გახსნაში მიიღებს მონაწილეობას.
[ ... ]

სამართალდამცავებმა ბავშვის მკვლელობაში ეჭვმიტანილები დააკავეს

თბილისის შს მთავარი სამმართველოს დეტექტივების სამმართველოსა და ისანი–სამგორის შს სამმართველოს თანამშრომლებმა მკვლელობაში ეჭვმიტანილები დააკავეს.
შსს-ს ინფორმაციით, დაკავებულია 1995 წელს დაბადებული ვალენტინ სერგოს ძე გრუნდინკინი და 1995 წელს დაბადებული ირაკლი ვაჟას ძე ავგუსტოვი. 
სამინისტროს ცნობით, აღნიშნულმა პირებმა 28 აგვისტოს მოტყუებით, ჯართის შეგროვებაში დახმარების საბაბით, ნავთლუღის ბაზრიდან მესამე მასივის ტერიტორიაზე მდებარე ერთ-ერთ მიტოვებულ ავტოფარეხში წაიყვანეს 8 წლის ალავერდ სერგოს ძე ბაირამოვი. 
მას წინასწარ მომზადებული წებოვანი ლენტით შეუკრეს ხელ-ფეხი და გაუკუღმართებული ფორმით დაამყარეს მასთან სქესობრივი კავშირი. 
დანაშაულის ჩადენაში მხილების შიშით, მათ ბაირამოვს თავში ჩაარტყეს სამშენებლო ბლოკის ნატეხი, რის შედეგადაც იგი გარდაიცვალა.

 





[ ... ]

მიხეილ სააკაშვილს დღეს ფოთში ელოდებიან

პრეზიდენტ მიხეილ სააკაშვილს დღეს ფოთში ელოდებიან.  
როგორც “ინტერპრესნიუსს” ქალაქ ფოთის მერიაში განუცხადეს, პრეზიდენტი ბეტონის ქარხანა “პრაიმ ბეტონის” გახსნას დაესწრება. 
სააკაშვილი დღესვე, სავარაუდოდ, ფოთის გემთშემკეთებელ ქარხანასაც ესტუმრება, სადაც რამდენიმე ხნის წინ რეკონსტრუქცია დასრულდა. 
გავრცელებული ინფორმაციით, იგეგმება პრეზიდენტის საზღვაო პოლიციის ბაზაზე მისვლაც, საიდანაც, სავარაუდოდ, რუსეთის მიერ საზღვაო აკვატორიის აფხაზეთის მონაკვეთის შესაძლო გაკონტროლებასთან დაკავშირებით განცხადება გააკეთდება.
პრეზიდენტს ფოთში 15.00 საათისთვის ელოდებიან.
[ ... ]

სასწრაფოდ! ძალადობა ვანოს სახელით[video]

[18.08.2009 19:26] ზუგდიდის რაიონულ სასამართლოში აკადემიკოს ვლადიმერ ვახანიას სასამართლო პროცესი განახლდა. შეგახსენებთ, რომ სამი თვის წინ ვახანიას, საცხოვრებელი სახლიდან სამართალდამცავებმა ცეცხლსასროლი იარაღი ამოიღეს, ჩხრეკის მიზეზი კი ჟურნალისტ ლელა ხუბულავასთვის პროფესიულ მოვალეობაში ხელის შეშლის ფაქტი გახდა.
ვლადიმერ ვახანია, რომელიც რუსეთში მოღვაწეობდა და საკმაოდ მდიდარი ბიზნესმენის სახელით სარგებლობს, საქართველოში ოპოზიციური პარტიის ჩამოყალიბებას გეგმავდა. როგორც მისი ახლობლები აცხადებენ ბიზნესმენის დაკავების ნამდვილი მიზეზი სწორედ ეს გახდა. 
აკადემიკოსი ვახანია არასამთავრობო ორგანიზაციათა კოლიცია „საზოგადოებრივმა დამცველმა“ უკვე აღიარა პოლიტიკურ პატიმრად.
18 აგვისტოს გამართული 6 საათიანი სასმართლო პროცესი გაურკვეველი ვადით გადაიდო. მიუხედავად ეჭვმიტანილის ჯანმრთელობის მძიმე მდგომარეობისა, ის დაუყოვნებლივ გადაიყვანეს თბილისის ორთაჭალის ციხეში. 
პროცესის დასრულების შემდეგ ზუგდიდის პოლიციის თანამშრომლებმა სიტყვიერი და ფიზიკური შეურაცხყოფა მიაყენეს შეკრებილებს და ჟურნალისტებს, რომლებიც პროფსიულ მოვალეობას ასრულებდნენ... დაპირისპირების მიზეზი გახდა ვახანიას დის სურვილი დედაქალაქში გადაყვანამდე, მისი ძმისთვის სამედიცინო დახმარება აღმოეჩინათ „03“–ის თანამშრომლებს.
„ღია ბოქლომის“ თანამშრომლებმა მოძალადე პოლიციელთა სახის გადაღება შესძლეს.



[ ... ]

აშშ საქართველოში საზღვაო ქვეითების გამოგზავნას იწყებს

ამერიკის შეერთებული შტატების შეიარაღებული ძალების პრესსამსახური საქართველოში საზღვაო ქვეითების გამოგზავნის შესახებ ოფიციალურ ინფორმაციას ავრცელებს.  
როგორც განცხადებაშია აღნიშნული, ქართული ბატალიონის მომზადების მიზნით, რომელიც ავღანეთის სამშვიდობო მისიაში (ISAF) მიიღებს მონაწილებას, საქართველოში 60-დან 70-მდე ამერიკელი სამხედრო ჩავა. 
„მიღებულია გადაწყვეტილება, გავაგზავნოთ საქართველოში საზღვაო ქვეითები, რომლებიც 750-კაციან ქართულ ბატალიონს სწავლებას ჩაუტარებენ. 6-თვიანი სწავლება პირველ სექტემბერს დაიწყება, ხოლო საზღვარო ქვეითთა რაოდენობა 60-დან 70-მდე იმერყევებს“,- ნათქვამია განცხადებაში. 
პრესსამსახური მიუთითებს, რომ აშშ-სა და საქართველოს ერთობლივი სწავლების დიდი ხნის ისტორია აქვთ. 1990-იან წლებში ამერიკელი საზღვაო ქვეითები საქართველოში ნატო-ს პროგრამა „პარტნიორობა მშვიდობისთვის“ ფარგლებში იმყოფებოდნენ. 
ამერიკელი საზღვაო ქვეითები საქართველოში დღეს, 15 აგვისტოს უნდა ჩამოვიდნენ.  
ავღანეთში უსაფრთხოების ხელშეწყობის საერთაშორისო ძალების შემადგენლობაში მონაწილეობის მისაღებად მეორე და მესამე ბრიგადები გაიწვრთნება.
[ ... ]

სალომე ზურაბიშვილი "საკანში"...

დღეს, პოლიტიკური პარტია „საქართველოს გზის“ ლიდერი სალომე ზურაბიშვილი ზუგდიდს ესტუმრა, მან ქალაქის ცენტრში განთავსებული საკნები მოინახულა და გაერთიანებული ოპოზიციის იმ წევრებს შეხვდა, რომლებიც უკვე მეოთხე თვა ქალაქის ცენტრში განთავსებულ „საკნებში“ ზიან. მოგვიანებით ზურაბიშვილმა პრესისთვის კომენტარი გააკეთა და აღნიშნა, რომ სამეგრელოში „საკნებს“ ფუნქცია ჯერ არ დაუკარგავს. 
„ეს აქცია, ზუგდიდში უნდა გაგძელდეს, რადგან ოპოზიციური მუხტი შენარჩუნდეს. „საკნები“ დედაქალაქში იყო საპროტესტო ტალღის დასაწყისი და მჯერა, რომ ასე იქნება სამეგრელოშიც“ – განაცხადა პოლიტიკური პარტიის ლიდერმა.






[ ... ]

ზუგდიდის “საკნის პატიმრები” „მიშა მაგარიას“ ამღერებენ [video]

ზუგდიდის „საკნის პატიმრებმა“ ახალი კლიპის „მიშა მაგარია?“–ს პრეზენტაცია ქალაქის შუაგულში გამართეს. ვიდეო–პროექტორზე ზუგდიდელები „მიშა მაგარია“–ს „განახლებულ“ ვარიანტს ისმენდნენ. საკნების აქციის მონაწილეებმა კლიპი საგანგებოდ დაამონტაჟეს, ტექსტი და მუსიკა იგივე დარჩა. ცნობილ კადრებში მიხეილ სააკაშვილი გაქცევითა და ჰალსტუხის ღეჭვით გამოჩნდა.

შეგახსენებთ, რომ ზუგდიდში საკნების აქცია შადრევანზე აცეკვებული “მიშა მაგარიას” ფონზე დიდი ხნის განმავლობაში მიმდინარეობდა. საკნის “პატიმრები” ამ სიმღერას დღე-ღამის განმავლობაში თითქმის განუწყვეტლივ ისმენდნენ.
“ჩვენ, მოსახლეობას დავანახეთ მიხეილ სააკაშვილის ნამდვილი სახე და ზუგდიდელ ჩინოვნიკებს და საზოგადოებას ვაჩვენეთ, თუ როგორი „მაგარია“ პრეზიდენტი სააკაშვილი “– აცხადებს კახა მიქაია.
 დიდ ეკრანზე კლიპის გამოჩენამ სამართალდამცავთა დაბნეულობა გამოიწვია...
[ ... ]

ფოთში რუსული აგრესიის ამსახველი ფოტოგამოფენა გაიხსნა

რუსეთ-საქართველოს ომის წლისთავთან დაკავშირებით დღეს ფოთში, რუსული აგრესიის ამსახველი ფოტოგამოფენა გაიხსნა.  
 ფოტოები "ინტერპრესნიუსის" ფოთის კორესპოდენტის ლაშა ზარგინავას მიერაა გადაღებული და მათზე 8 აგვისტოს, პორტის დაბომბვიდან მოყოლებული 13 სექტემბრამდე, ფოთიდან რუსული ძალების გასვლამდე ქალაქში არსებული ვითარება დეტალურადაა ასახული. 
 ფოთის საგამოფენო დარბაზ-სალონში გამოფენილი 50 ფოტოს დათვალიერება მსურველს ერთი კვირის განმავლობაში შეეძლება. 

 ფოთის პორტი გასული წლის 8 აგვისტოს ღამით დაიბომბა. სულ რუსული აგრესიის შედეგად 12 ფოთელი ახალგაზრდა დაიღუპა - ხუთი საზღვაო ძალების წარმომადგენელი და ხუთი ნავსადგურის თანამშრომელი, ორი რეზერვისტი კი სენაკის დაბომბვას ემსხვერპლა.

["ინტერპრესნიუსი"]


[ ... ]

დიმიტრი მედვედევი ვლადიკავკაზში ჩავიდა

რუსეთის პრეზიდენტი დიმიტრი მედვედევი ვლადიკავკაზში ჩავიდა. ამ ინფორმაციას `გაზეტა რუ~ `იტარ-ტასზე~ დაყრდნობით აცხადებს.
მედვედევი დღეს ჩრდილოეთ ოსეთში ე.წ. სამხრეთ ოსეთის აგვისტოს ომის წლისთავზე ჩავიდა, სადაც სამხედრო მოქმედებების დროს გამოჩენილი თავდადებისთვის სამხედრო მოსამსახურეები სახელმწიფო ორდენებით დააჯილდოებს. მედვედევი ასევე, სამხრეთ ოსეთიდან ჩამოსულებს შეხვდება.  
რუსეთის პრეზიდენტს აეროპორტში სამხრეთ ფედერალურ ოლქში პრეზიდენტის სრულუფლებიანი წარმომადგენელი ვლადიმერ უსტინოვი, თავდაცვის მინისტრი ანატოლი სერდიუკოვი და ჩრდილოეთ ოსეთის მთავრობის ხელმძღვანელი ტაიმურაზ მამსუროვი შეხვდნენ.
დაჯილდოების ცერემონია ჩრდილო-კავკასიის სამხედრო ოლქის 58-ე არმიის შტაბის ტერიტორიაზე მოხდება, რომელიც ვლადიკავკაზთან ახლოს მდებარეობს.
[ ... ]

www.naec.ge-ზე ეროვნული გამოცდების შედეგები განთავსდა

გამოცდების ეროვნული ცენტრის ვებგვერდზე - www.naec.ge ინგლისური და რუსული ენების გამოცდების შედეგები და აბიტურიენტთა ნაშრომების ასლები განთავსდა. 
აბიტურიენტებს საკუთარი შედეგებისა და ნამუშევრების ასლების მოძიება შეუძლიათ, ასევე, ვებგვერდზე - www.2009.naec.ge.  
სააპელაციო განაცხადების მიღება ყველა გამოცდის შედეგების გამოქვეყნების შემდეგ დაიწყება. 
აბიტურიენტებს შედეგების გაგება მოკლე ტექსტური შეტყობინებითაც შეუძლიათ, ამისათვის მათ 9-ციფრიანი საიდენტიფიკაციო კოდი უნდა გააგზავნონ ნომერზე - 62 32.

[ ... ]