პროკურატურამ ფოთის "წყალკანალის” დირექტორი დააკავა
სამეგრელო-ზემო სვანეთის საოლქო პროკურატურამ კომპანია “ფოთის წყალკანალის” გენერალური დირექტორი დააკავა. სამაუწყებლო კომპანია “რუსთავი 2”-იც ცნობით, ვლადიმერ მსხილაძეს ბრალად საბიუჯეტო თანხის – 800000 ლარის მითვისება ედება.მსხილაძემ კოპანია “ქემაილის” დირექტორთან, გოგი მოდებაძესთან შეთანხმებით, სახელმწიფო პროექტის განსახორციელებლად განკუთვნილი თანხები მიზანმიმართულად გაზარდა.
გამოძიების მტკიცებით, ამ კორუფციული გარიგებით ბიუჯეტმა მილიონი ლარით იზარალა. გაზრდილი თანხის ნაწილი პროექტის განხორციელებამდე მოიხსნა ანგარიშიდან. სამართალდამცველების განცხადებით, კომპანია “ქემაილმა” და ფოთის წყალკანალმა სამუშაოები კანონდარღვევით ჩაატარეს.
პროექტის თანახმად, სენაკისა და ფოთის ახალი წყალგამანაწილებელი ქსელის რეაბილიტაცია-მშენებლობასაც ითვალისწინებდა, პროექტის ფარგლებში ფოთი-ნოსირის ახალი მაგისტრალიც უნდა აშენებულიყო.
გამოძიების ინფორმაციით, კორუფციულ გარიგებაში მყოფმა კომპანიის ხელმძღვანელებმა პროექტის განსახორციელებლად უკვე ნახმარი მილები შეიძინეს.
